شهدات أسواق الطاقة فـ أوروبا قفزة تاريخية فـ هوامش أرباح البنزين بالمقارنة مع ثمن البترول الخام، فاش سجلات أكبر ارتفاع أسبوعي فـ السجل ديالها. هاد التحول عطى نفس جديد لشركات التكرير الأوروبية اللي كانت كتعاني من ضغوطات كبيرة بسبب غلاء المادة الخام، نتيحة التوترات الجيوسياسية والحرب اللي نايضة بين ميريكان وإسرائيل ضد إيران.
وحسب وكالة “بلومبرغ”، جيهة الربح فـ البنزين وصلات لـ 17 دولار للبرميل نهار الجمعة اللي فات، بزيادة فايتة 25 دولار على السيمانة اللي قبل، وهادي أعلى زيادة تعقل عليها البيانات من عام 2010. هاد الروينة فـ الأثمنة جاية أساساً من التقلبات اللي كيعرفها ثمن البرميل؛ فالبداية ديال أبريل، “خام برنت” وصل لثمن قياسي هبط بالأرباح للأرض، ولكن فاش تراجع ثمن النفط فـ لخر ديال السيمانة، رجعات الروح لمصافي التكرير.
الخبراء كيعتبرو بلي هاد القفزة عتقت بزاف ديال المصافي من خطر تقليص الإنتاج، حيت هامش الربح رجع فات 10 دولار للبرميل. ومع ذلك، كيبقاو المحللين كينبهو بلي الاستمرارية هي الساروت باش هاد الشركات تفادى خفض وتيرة العمل ديالها وتضمن الاستقرار فـ السوق الأوروبي.