بضغط مباشر من السائقين، قررات إدارة “الفورمولا 1″ تدخل تعديلات جديدة على القوانين المنظمة للبطولة، هدفها تقليل القيود التقنية وتوجيه التركيز للأداء الرياضي الخالص. هاد القرار جا مورا انتقادات لاذعة وجهوها أبطال كبار، وعلى رأسهم ماكس فيرستابن، اللي عبر على الاستياء ديالو من القوانين المقترحة لعام 2026، معتبراً بلي الاعتماد المفرط على تدبير البطارية و”أدوات التجاوز” الاصطناعية كيفقد الرياضة الجوهر ديالها.
التغييرات الجديدة، اللي تفقات عليها الـ FIA مع مدراء الفرق، غادي يبدا التطبيق ديالها انطلاقاً من سباق الجائزة الكبرى فـ “ميامي”. الهدف الأساسي هو السماح للسائقين بتقديم أقصى جهد فالتصفيات بلا ما يضطروا ينقصوا السرعة باش يشحنوا البطاريات. هاد الخطوة جات حتى كاستجابة لمخاوف أمنية، خاصة مورا الحادث الخطير ديال “أوليفر بيرمان” فاليابان، اللي كشف خطورة تفاوت السرعات بين السيارات فالمضمار.
ومن المتوقع تزيد تعمق النقاشات مورا سباق ميامي، خصوصاً وأن الأجندة عرفات توقف مفاجئ بسباب إلغاء سباقات البحرين والسعودية للظروف السياسية فالمنطقة، الشيء اللي كيعطي فرصة للأطراف المعنية باش تراجع تفاصيل قانون 2026 بشكل أدق.