كشف مايكل أوليري، المدير العام ديال شركة “رايانير” (Ryanair)، بلي لمغريب كاين ضمن الوجهات المرشحة باش يحتضن مراكز جديدة خاصة بصيانة المحركات (MRO). هاد المشروع الضخم، اللي كيتنافسو عليه ستة ديال الدول من بينها صبانيا، إيطاليا، وإيرلندا الشمالية، كيهدف لإنشاء جوج مواقع ديال الصيانة باستثمار إجمالي كيوصل لـ 800 مليون دولار.
وصرح أوليري لـ “أفياشن ويك” بلي لمفاوضات مازال جارية، ومن المنتظر ياخدو القرار النهائي بخصوص الموقع اللول في الشهور القليلة الجاية. هاد الخطوة جات من بعد توقيع اتفاقية استراتيجية مع شركة “CFM International” كتمتد لـ 15 عام، لضمان تزويد الأسطول بقطع الغيار وصيانة المحركات.
ووضح المسؤول بلي السوق المغربي كيتعتبر من أسرع الأسواق نمواً لعند “رايانير”، وهو اللي خلا الشركة تعزز التواجد ديالها مؤخراً بافتتاح خامس قاعدة جوية ليها فمدينة الرباط، الشيء اللي كيقوي حظوظ لمغريب باش يولي قطب صناعي فهاد المجال.