أعلن نادي جيروندان بوردو الفرنسي لجوؤو لمحكمة التحكيم الرياضي (TAS) باش يطعن في قرار “الفيفا” اللي منعاتو من الانتدابات لثلاث فترات متتالية. هاد الأزمة بدات فاش وضع نادي خيخون الصبليوني شكاية كيطالب فيها بـ 1.5 مليون يورو كباقي مستحقات انتقال اللاعب بيدرو دياز، وهي خطوة كتهدد مستقبل النادي للي كيمارس دابا في الدرجة الرابعة.
دفاع بوردو، وعبر المحامي ماتيو بارانداس، وصف الوضعية بـ “الكافكاوية” والمعقدة قانونياً؛ حيت النادي كيمر من مخطط استمرارية وافقت عليه المحكمة التجارية الفرنسية كيقضي بتقليص الديون بنسبة 75%. هاد التضارب بين القوانين الرياضية الدولية والمساطر القضائية الفرنسية وضع النادي في مأزق، خصوصاً وأن “الفيفا” كتعامل مع الملف وكأن مخطط التسوية ما عندو حتى أثر قانوني.
المخاوف كبرات من إمكانية لجوء أندية أخرى لنفس الخطوة، بحال آيك أثينا ودينامو باتومي، الشيء اللي غادي يعمق جراح الفريق اللي كيطمح للصعود للدرجة الثالثة، وهو حالياً كيحتل المركز الثاني في مجموعتو قبل 6 دورات من نهاية الموسم.