الجيش ميريكاني كيتجهز بتقنية أوكرانية باش يحمي القواعد ديالو من هجمات الدرون.

ولات القوات المسلحة الأوكرانية مرجع حقيقي فمجال تكنولوجيا طيارات “الدرون” وأنظمة الدفاع ضدها. هاد التفوق دفع الجيش الميريكاني باش يدمج تقنيات أوكرانية فلقاعدة الجوية “الأمير سلطان” فالسعودية، فين وصلوا خبراء أوكرانيين باش يدربوا الميريكانيين على لوجيسيال “Sky Map”.

هاد النظام، اللي طوراتو شركة “Sky Fortress”، كايخدم بحال لوحة قيادة كاتجمع البيانات من الرادارات وكاميرات الاستشعار باش تحدد التهديدات وتوجه طيارات اعتراضية بدقة. وحسب وكالة “رويترز”، هاد الخطوة كاتبين بلي كاين ثغرات قديمة فأنظمة الدفاع الجوي الميريكانية، خصوصا وأن هاد القاعدة كاين فمنطقة قريبة من إيران وسبق تعرضات لهجمات بالدرونات.

الغريب فالموضوع هو أن هاد التعاون جا من بعد ما رفض الرئيس دونالد ترامب علانية عرض ديال زيلينسكي للمساعدة فمارس الفايت، حيت صرح بلي ميريكان ما محتاجاش مساعدة أوكرانيا فهاد المجال. ولكن الواقع فرض راسو، وخصص البنتاغون ميزانية ديال 350 مليون دولار باش يعزز دفاعاتو هاد العام، معتبرا بلي مكاينش شي حل سحري واحد كايوقف كاع التهديدات، ولكن تكنولوجيا “Sky Map” ولات اليوم ركيزة أساسية لضمان الأمن الجوي.