احتضنت الرباط، نهار الجمعة، جولة جديدة من الحوار الاجتماعي برئاسة رئيس الحكومة وبحضور النقابات والباطرونا. هاد اللقاء خصصوه باش يوقفو على الحصيلة المرحلية للاتفاقات اللي تدارت وكيفاش غادي يكملو المسار.
الحكومة أكدت بلي كاين مجهود كبير لتحسين الدخل، حيث تزاد للوظيف العمومي 1000 درهم صافية فالشهر، وطلع متوسط الصالير بـ 29% ما بين 2021 و2025 (من 8237 لـ 10600 درهم). هاد الإجراءات كلفت الدولة ميزانية ضخمة غادي توصل لـ 49.7 مليار درهم فـ 2027، بلا ما ننساو الاستثمارات القطاعية فمجال التعليم والصحة.
وفالقطاع الخاص، “السميغ” (SMIG) تزاد بـ 20% باش يوصل لـ 3422 درهم، و”السماك” (SMAG) فالفلاحة طلع بـ 25% فـ 2026. أما الحماية الاجتماعية، فعرفات ثورة بإصلاح شروط التقاعد، حيث هبطو عتبة الاستفادة من 3240 لـ 1320 يوم ديال المساهمة، مع مراجعة الضريبة على الدخل اللي ربحات الموظفين كتر من 400 درهم فالشهر.
المستقبل فيه أوراش باقة مفتوحة، بحال مراجعة مدونة الشغل باش تنقص ساعات الخدمة لصحاب الحراسة، وإصلاح صناديق التقاعد، وتعديل الأنظمة الأساسية ديال المهندسين والتقنيين والمتصرفين قبل نهاية الولاية الحكومية.