أعلنات “البيت الأبيض” بشكل رسمي على إدماج المغرب فالمجموعة المكلفة بتأمين ننهائيات كاس العالم 2026 اللي غاتنظمها الولايات المتحدة، كندا، والمكسيك. هاد القرار جات فيه تهنئة من السفارة الأمريكية بالرباط، اللي اعتبرات هاد الخطوة فرصة جديدة لتمتين التعاون الأمني بين البلدين، تزامناً مع الاحتفال بمرور 250 عام على الصداقة المغربية الأمريكية.
هاد الشراكة الاستراتيجية كاتجي من بعد زيارة وفد من “الـFBI” للمملكة المغربية، فين تدارت لقاءات رفيعة المستوى مع السيد عبد اللطيف حموشي، المدير العام للأمن الوطني ومراقبة التراب الوطني، للوقوف على الترتيبات الأمنية الخاصة بكاس إفريقيا 2025.
المؤسسات الدولية ولات كاتوِضع ثقة كبيرة فالخبرة المغربية فمجال تأمين التظاهرات الكبرى، خصوصاً من بعد النجاح الباهر اللي حققاته الأجهزة الأمنية فالمساهمة في تأمين مونديال قطر 2022 والألعاب الأولمبية بباريس 2024. هاد الاختيار كايأكد مرة أخرى السمعة العالمية اللي بناها المغرب كشريك موثوق فيه ورائد فالحفاظ على الأمن والاستقرار الدولي.