عمدة نيويورك الجديد، زوهران ممداني، ناض بجهد كينتقد السياسة الخارجية ديال إدارة ترامب، بسباب التكاليف الخيالية ديال الحرب اللي شاعلة فشرق الأوسط. ممداني وضح فصريح إذاعي بلي الميريكان كتصرف كتر من 500 مليون دولار يومياً فهاد النزاع، واعتبر هادشي “تبذير” كيعكس سياسة فقدات المعنى ديالها.
هاد الأرقام اللي جبد العمدة، وخا كتبان صادمة، راه غادة مع الواقع. التقارير ديال “البنتاغون” كشفات بلي غير فستيام اللولة ديال عملية “Epic Fury”، ميزانية الحرب وصلات لـ 11.3 مليار دولار، يعني بمعدل كقدّر بـ 2 مليار دولار فاليوم فالبداية. ومن جيهة خرى، دراسات ديال جامعة بنسيلفانيا (PWBM) أكدات بلي فظرف شهر واحد، التكلفة فاتت 28 مليار دولار.
وخا الوتيرة ديال القصف نقصات شوية مقارنة بالنهار لول، إلا أن المصاريف باقة طالعة بسباب استعمال أسلحة دقيقة وغالية بزاف. هاد التقرير كيبين بلي الحرب ماشي غير خسارة بشرية، ولكن كنزيف مالي كبيير كيتحملوه الضرايب ديال الميريكانيين، وفنفس الوقت كيطرح تساؤلات حارقة على أولويات واشنطن فهاد الظرفية.