أكدات الأمينة العامة لـ “منظمة الأمم المتحدة للسياحة”، الشيخة ناصر النويس، باللي المغرب كيتعتابر نموذج إفريقي رائد فمجال التنمية السياحية المبتكرة. وفكلمتها فمراكش بمناسبة الدورة الثانية للمؤتمر الدولي حول “الابتكار التكنولوجي والاستثمار السياحي”، نوهّات بالريادة ديال المملكة اللي كاترتكز على الاستقرار السياسي، البنيات التحتية العصرية، والغنى الثقافي، والرؤية الاستراتيجية بعيدة المدى.
واعتبرات النويس باللي تدشين أول مكتب موضوعاتي للمنظمة فإفريقيا بالرباط، كايجسد الشراكة القوية مع المغرب وكيشجع بلدان القارة باش ينهجو نفس المسار. كما شاّدت بالذكاء المغربي فاستغلال “السرد الترابي”، حيت قدر يحول التراث المادي واللامادي لتجارب حقيقية وكايجذب السياح من كاع العالم.
هاد اللقاء، اللي نظماتو الشركة المغربية للهندسة السياحية (SMIT) بشراكة مع وزارة السياحة، كيهدف لضخ نفس جديد فمجال الاستثمار السياحي ودعم المشاريع المبتكرة. وشهد هاد الحدث توزيع جوائز على أحسن المقاولات الناشئة فمنافسة شارك فيها 275 مشروع، مع الإعلان على مسابقة جديدة خاصة بالسياحة القروية، باش يتم تنويع العرض الوطني وخلق قيمة مضافة فكاع جهات المملكة.