من بعد المواجهة الحامية اللي جمعاتهم في نصف نهائي عصبة الأبطال الإفريقية، تجدّد اللقاء بين الجيش الملكي ونهضة بركان يوم الأربعاء في ماتش مؤجل عن الجولة 12 من البطولة الاحترافية. هاد المرة، ساوات الكفة بين الفريقين وسالا الماتش بالتعادل السلبي (0-0) فوق تيران المجمع الرياضي الأمير مولاي عبد الله بالرباط.
هاد النقطة كانت في صالح “العساكر”، اللي قدروا يلتحقوا بصدارة الترتيب ويشاركوا المركز الأول مع المغرب الفاسي. في المقابل، الوضعية ولّات صعيبة بزاف على أولمبيك آسفي؛ الفريق اللي وصل لنصف نهائي كأس الكاف، لقى راسو خاسر خسارة قاصحة قدام نهضة الزمامرة بنتيجة (1-3)، الشي اللي خلاه واحل في أسفل الترتيب وكيعاني في المراكز الأخيرة.