أطلقات وزارة الاقتصاد والمالية وبنك المغرب فكازا الاستراتيجية الوطنية لتمويل سلاسل الإنتاج (Supply Chain Finance)، بدعم من مؤسسة التمويل الدولية (IFC). هاد المبادرة كتهدف لتطوير حلول تمويلية كتمكن المقاولات الصغرى والمتوسطة (PME) من تجاوز مشاكل السيولة وتعطال الخلاص، حيت هاد الشركات كتمثل 99.5% من النسيج الاقتصادي، ولكن المساهمة ديالها فـالناتج الداخلي الخام والتحصيل باقة محدودة.
الدراسات بينات بلي سوق تمويل سلاسل الإنتاج فالمغرب كيقدر بـ 80 مليار درهم، فـالوقت اللي المستغل منو حالياً ضعيف بزاف. الاستراتيجية الجديدة مبنية على تلاتة د الركائز: تعزيز الحلول اللي كاينة دابا بحال “L’affacturage”، تنويع الأدوات باش تشمل تمويل سندات الطلب والمخزون، وتوسيع هاد العمليات لتشمل الصفقات الدولية والمالية التشاركية.
هاد الورش كيعتمد بزاف على الرقمنة (Digitalisation) ومنصات التكنولوجيا لتسهيل العمليات وتقليل المخاطر. التنفيذ غادي يمتد على ربع سنين، تحت إشراف لجنة قيادة مشتركة بين الوزارة وبنك المغرب، مع نظام تتبع دقيق باش يضمنوا بلي التمويل كيوصل فعلياً للمقاولات الصغرى وكيساهم فدفع عجلة الاقتصاد الوطني.