برلين: روسيا غادي تحبس تصدير النفط الكازاخي لمصفاة ألمانية.

أفادت وزارة الطاقة الألمانية بلّي موسكو تّاوية تحبس تدفق النفط الكازاخي اللي كيدوز عبر أنبوب “دروجبا” للمصفاة ديال “بي سي كيه” (PCK) فشرق ألمانيا، وهادشي ابتداءً من فاتح ماي الجاي.

وحسب المعطيات اللي تنشرات، الفرع الألماني ديال شركة “روسنفت” الروسية علّم الجهات المنظمة فبرلين بلّي وزارة الطاقة فموسكو صدرات أمر بوقف الإمدادات، وخا روسيا مزال ما كدّبات ولا أكدات هاد الخبر بصفة رسمية. حالياً، “روسنفت ألمانيا” كتدير تقييم للآثار ديال هاد الإغلاق وكتقلب على حلول باش تضمن استمرارية التزويد بالطاقة فبلادها.

وخا مصفاة “بي سي كيه” هي اللي كتزود منطقة برلين بالوقود، إلا أن الحكومة الألمانية طمأنات الرأي العام، وأكدات بلّي أمن الإمدادات محمي وما كاينش خطر كبير، حتى لو اضطرت المنشأة تخدم بقل من طاقتها الإنتاجية. هاد الصراع الجديد كيزيد يعقد المشهد الطاقي فأوروبا، خصوصاً وأن هاد الأنبوب كيدوز من أراضي روسية وبيلاروسية، والتوترات السياسية مع أوكرانيا والمجر زايدة كتأزم الوضع من بعد ما تحطات “روسنفت ألمانيا” تحت الوصاية بسبب العقوبات الأوروبية على روسيا.