واجه كيفن وارش، المرشح لرئاسة البنك المركزي الأميركي (الفيدرالي)، جلسة استماع قوية قدام لجنة الشؤون المصرفية فمجلس الشيوخ باش يصادقو على التعيين ديالو. وارش، اللي فعمرو 56 عام وممكن يولي أغنى رئيس فتاريخ هاد المؤسسة، أكد بلي البنك غادي يبقى مستقل تماماً على البيت الأبيض ودافع على ضرورة اتخاذ القرارات الصائبة بعيداً على ضغوط السياسيين.
وارش صرح بوضوح بلي ما عطى حتى شي وعود للرئيس ترامب بخصوص خفض أسعار الفائدة، ووضح بلي واخا الرؤساء كيبغيو الفائدة تهبط، الاستقلالية ديال “الفيدرالي” هي اللي كتحمي الاقتصاد. وخلال الجلسة، حاول وارش يشد العصا من الوسط؛ من جهة كيبين بلي ما غادیش يتصادم مع ترامب، ومن جهة أخرى كيأكد بلي ما غاديش يفرط فحياد البنك. وحتى فاش سولاتو السيناتور إليزابيث وارن على نتائج انتخابات 2020، هرب من الجواب المباشر وقال بلي “الفيدرالي” كيخصو يبقى بعيد على الصراعات السياسية. هاد التطورات كتحط وارش تحت المجهر، خصوصاً مع تاريخ الضغوط اللي مارسها ترامب على الرئيس الحالي جيروم باول.