كلوديو رانييري كيكشف السبب “الصادم” وراء الإقالة ديالو من ليستر سيتي، تسع شهور مورا ما حقق لقب الدوري الإنجليزي.

كشف المدرب الإيطالي المخضرم كلاوديو رانييري على تفاصيل مثيرة بخصوص إقالتو من تدريب نادي ليستر سيتي، وهي الخطوة اللي بقات غصة فقلوب بزاف ديال المشجعين. رانييري أكد فحوار مع مجلة “Four Four Two” باللي القرار ما كانش بسبب النتائج الرياضية بوحدها، بل كاين كواليس خفية صدماتو.

رانييري صرح باللي ولد رئيس النادي وضح ليه من بعد باللي المشكل الحقيقي كان هو الصراع مع أعضاء إنجليز فلطاقم التقني. وحكى المدرب باللي واحد من هاد المساعدين كان كينتقد العمل ديالو قدام اللعابة فاش كانوا متصدرين الدوري، ووصف عدم التخلص منو فديك الوقيتة بـ “الغلطة الفادحة”. رانييري فضل يركز على اللقب ويخلي الأمور دوز، لكن هاد العضو استغل الثقة واستمر فتشويه الصورة ديالو فالموسم الموالي، الشئ اللي أدى فالاخير للنهاية غير المتوقعة لقصة خيالية فالدوري الإنجليزي. هاد الاعترافات كبينات باللي “الخيانة الداخلية” كانت هي السبب الرئيسي وراء رحيل مهندس معجزة ليستر سيتي.