فواحد الخطوة كاتبيّن القوة التكنولوجية ديال الشينوا، خلعات الأوساط العلمية والرياضية من بعد ما حقق “روبوت بشري” إنجاز تاريخي فالعاصمة بكين. هاد الروبوت، اللي تابع لشركة “هونر”، قدر يربح سباق “نصف ماراثون” مخصص للروبوتات، وقطع مسافة 21 كيلومتر فـ 50 دقيقة و26 ثانية بضبط.
هاد التوقيت ماشي غير ربح بيه السباق، بل حطم بيه الرقم القياسي العالمي ديال البشر اللي مسجل فسميت العداء الأوغندي جاكوب كيبلومو (57 دقيقة)، هادشي كايعكس قفزة عملاقة وتطور سريع بزاف مقارنة مع العام اللي فات، فين كان الروبوت الفائز كايحتاج كتر من ساعتين باش يكمل نفس المسافة.
السباق عرف مشاركة وازنة ديال كتر من 100 فريق، وخا الإثارة كانت حاضرة ببعض المشاكيل التقنية بحال سقوط بعض الروبوتات فخط الانطلاق. هاد الحدث كايأكد عزم الصين باش تسيطر على مجال الذكاء الاصطناعي والروبوتات، وتبيّن باللي هاد الآلات ولات قادرة تتفوق على القدرات البدنية ديال الإنسان فمجالات كانت كاتعتابر حكر على البشر.