علنات وزارة الخزانة ميريكانية على قرار كبّير كيقضي برفع العقوبات على البنك المركزي الفنزويلي وثلاثة د المؤسسات بنكية أخرى ف لبلاد. هاد الخطوة غاتمكن هاد الأبناك باش يقدمو خدمات مالية متنوعة، بحال تسيير الحسابات، وإصدار لبطاقات البنكية، وتحويل الأموال، وعمليات الصرف لفائدة الفنزويليين اللي عايشين ف ميريكان.
هاد التطور كيجي ف سياق تطبيع تدريجي للعلاقات بين واشنطن وكراكاس، من بعد ما علنات الخارجية لميريكانية ف مارس اللي فات على استئناف العلاقات الدبلوماسية اللي كانت مقطوعة من 2019. وف هاد الإطار، تحيّدات حتى العقوبات اللي كانت مفروضة على “ديلسي رودريغيز”، الرئيسة المؤقتة د فنزويلا، من بعد الأحداث السياسية الأخيرة اللي عرفاتها البلاد.
إدارة واشنطن ولات دابا كتميل لتعزيز التعاون مع القيادة الجديدة ف كراكاس، خصوصاً باش تجلب استثمارات أجنبية لقطاع النفط الفنزويلي وتدعم الاستقرار الاقتصادي. هاد المسار التقرّبي تأكد كتر من بعد ما رجعات السفارة لميريكانية تخدم ف فنزويلا، وتسهلات الأمور قدام البعثات الدبلوماسية الفنزويلية ف ميريكان، الشيء اللي كيبشر بمرحلة جديدة د التعاون بين البلدين.