كشف أحدث تقرير لوكالة الطاقة الدولية باللي إنتاج النفط الخام فروسيا وصل لـ 9 دالمنيون برميل يومياً فـمارس، واخا هاد الرقم قل بشوية مقارنة بالعام للي فات، إلا أن المداخيل الروسية تضاعفات بسباب القفزة النوعية فالأثمنة، حيث نتقلات من 9.7 لـ 19 مليار دولار فظرف شهر واحد.
هاد الانتعاشة الاقتصادية لموسكو جاية بالأساس من ارتفاع سعر خام “الأورال” للي فات 106 دولار للبرميل، مستافدة من التوترات الجيوسياسية فـالشرق الأوسط، وبالخصوص الاضطرابات للي عرفها مضيق هرمز، الشيء للي خنق الإمدادات العالمية وطلع الطلب على البترول الروسي بأسعار كاتفوق بزاف داكشي للي كان مسطر فالميزانية ديالهم.
فالمقابل، وكالة الطاقة الدولية كتدق ناقوس الخطر بخصوص عام 2026، وتوقعات تراجع فالاستهلاك العالمي للذهب الأسود بسباب “أخطر أزمة إمدادات فالتاريخ”. هاد الأزمة، للي تسببات فضياع ملايين البراميل يومياً نتيجة النزاعات والضربات للي استهدفات البنيات التحتية الطاقية فمنطقة الخليج، خلات التوقعات المستقبلية تميل لانخفاض الطلب العالمي، خاصة مع استمرار الغلاء ونقص الشحنات للي جاي من مضيق هرمز.