وعرفات أسواق الطاقية فـأوروبا حالة من الغليان نهار هاد التنين، بحيث قفزات أسعار الغاز بشكل مهول بسباب تصاعد التوتر فـالشرق الأوسط وفشل المفاوضات بين ميريكان وإيران. هاد الروينة خلات ثمن الغاز فالسوق الهولندية (اللي هي المرجع للأوروبيين) يطلع بـ 12%، ويوصل لـ 49 يورو للميغاوات/ساعة، بل كاع وصل لـ 51 يورو فواحد الوقيتة.
السبب الرئيسي لهاد “الزلزال” فـالأسعار هو لقرار اللي خداه الرئيس الميريكاني دونالد ترامب، بفرض حصار بحري فوري على السفن اللي غادية ولا جاية من الموانئ الإيرانية. واخا هاد الحصار ما حبسش السفن اللي دايزة من مضيق هرمز وموجهة لبلايص خرين، إلا أن السوق تفاعلات بخلع كبير، وطلع سعر برميل “برنت” لأكثر من 102 دولار، بينما الخام الميريكاني قرب يوصل لـ 105 دولارات.
المحللين حذروا بلي هاد التوتر فـمنطقة هرمز، اللي كيدوز منها خمس إمدادات النفط فـالعالم، غادي يزيد الضغط على الاقتصاد الأوروبي وغادي يخلخل تدفقات الطاقة فـلعيالم كامل، الشيء اللي كيهدد بولاية صعيبة على الدول اللي كتستورد المحروقات.