أسواق النفط العالمية عرفات تراجع طفيف اليوم الأربعاء، بعدما كانت بدات نهارها في آسيا بزيادة قوية بلغات دولار للبرميل. هاد التذبذب جا فاش كايحاول المستثمرين يحللو آفاق محادثات السلام بين ميريكان وإيران، خصوصا بعدما قرر دونالد ترامب يمدد وقف إطلاق النار لأجل غير مسمى باش يخلي لباب مفتوح للمفاوضات ويحمي الاقتصاد العالمي.
خام برنت تراجع بـ 0.2 في المئة باش يوصل لـ 98.27 دولار، ونفس الشيء بالنسبة لخام غرب تكساس الوسيط اللي طاح بـ 0.3 في المئة واستقر فـ 89.39 دولار. ورغم هاد التمديد “الأحادي الجانب”، مضيق هرمز اللي كيدوز منو خمس إمدادات الطاقة العالمية مازال فيه الشلل، وما دازو منو غير تلاتة د السفن فـ 24 ساعة، حيت ميريكان مازال مفرضة حصار بحري على الموانئ الإيرانية.
المحللين كيأكدوا بلي السوق تالفة وماعندهاش اتجاه واضح مادام مصير مضيق هرمز معلق. وفنفس السياق، كيدرس ترامب يمدد الإعفاء من “قانون جونز” باش يسهل نقل الوقود بسفن أجنبية بين الموانئ الميريكانية، فمحاولة منو باش يفراني غلاء الأسعار اللي تسببات فيه الحرب مع طهران.