بعد الانتصار الباهر اللي حققوه على تانزانيا بثلاثية نظيفة، تعادلو “لبؤات الأطلس” بنتيجة (1-1) فالمواجهة الودية اللي جمعاتهم بالمنتخب المالي، نهار الجمعة 17 أبريل، بملعب مولاي الحسن فالرباط.
المهاجمة ونائبة القائدة، ابتسام جرايدي، هي اللي سجلات هدف التعادل فالدقيقة 61، فمباراة كانت قوية ضد منتخب مالي اللي كيحتل المركز 85 عالمياً وكان وصل لربع نهائي “كان 2022”. هاد اللقاء كيدخل فإطار الاستعدادات المكثفة ديال المنتخب الوطني لنهائيات كأس أمم إفريقيا للسيدات، اللي غادي تنظمها بلادنا فالفترة ما بين 25 يوليوز و16 غشت 2026.
كتيبة المدرب خورخي فيلدا كتواجد فالمجموعة الأولى رفقة الجزائر، السنغال، وكينيا، وهاد المباريات الودية كتشكل محطة أساسية باش يرفعو من مستوى الجاهزية ديالهم قبل انطلاق هاد العرس الكروي القاري، والهدف هو تشريف الكرة المغربية والبقاء فالقمة.