من مور فينال كاس إفريقيا، باقيا القضية ديال المشجعين السنغاليين شاعلة فالمحاكم المغربية. محكمة الاستئناف فالرباط قررات نهار الاثنين تأيد الأحكام الصادرة فحق 18 مشجع سنغالي، اللي كيتراوح الحبس ديالهم بين تلت شهور وعام، بتهمة “الشغب الرياضي” والاعتداء على ممتلكات التيران والقوات العمومية نهار الماتش ضد المغرب.
النيابة العامة تشبتات بلي الصور شافها العالم كامل لايف، ورفضات تطلق سراحهم رغم أن الدفاع أكد بلي المتهمين دخلوا للتيران غير باش يهربوا من الزحام وماشي باش يشغبوا. المحامية نعيمة الكلاف والمحامي باتريك كابو طالبوا بعرض براهين وفيديوهات كتبين هاد الأشخاص وهما كيخربوا، واعتبروا بلي اللي داروا الشغب بصح راهم فالسنگال ماشي فالحبس.
هاد الملف كايجي فوقت كاين فيه توتر رياضي قانوني، حيت السنغال لجأت لمحكمة التحكيم الرياضي “طاس” باش تطعن فقرار “الكاف” اللي منح اللقب للمغرب “بقرار إداري”. السيمانة الجاية غادي يبدا يخرج الفوج الأول من المشجعين اللي كملوا عقوبة تلت شهور، ولكن المعركة القانونية باقيا طويلة فالكواليس.