فـ “السانتياغو بيرنابيو”، قدر الريال مدريد ينفض عليه غبار الشك ويغلب ديبورتيفو ألافيس بـ 2-1 فالدورة 33 من الليغا. هاد الفوز جا برجلين الهدافين كيليان مبابي فالدقيقة 30 وڤينيسيوس جونيور فالدقيقة 50، بينما ألافيس قلص الفارق فأنفاس اللقاء الأخيرة عن طريق طوني مارتينيز.
الماتش عرف توتر كبيير، خصوصاً مع الصافرات القوية اللي استقبلات بها الجماهير إدواردو كامافينغا فاش دخل، بسبب طردو الأسبوع اللي فات ضد البايرن، وحتى مبابي وڤينيسيوس ما سلموش من انتقادات الجمهور الخايف من موسم صفري. الضربة القاصحة للريال كانت هي إصابة إيدير ميليتاو اللي خرج كيعرج وكيتألم فالركبة ديالو قبل اللقاء ما يسالي الشوط اللول.
بهاد النتيجة، الريال مدريد حافظ على المركز الثاني وبقى مطارد للمتصدر برشلونة بفارق 6 د النقط، فانتظار الماتش الناقص د البارصا والكلاسيكو المصيري اللي جاي. أما ألافيس، فبقى فوضعية صعيبة فالمركز 17 قريب من مناطق الخطر.