ديمار على هيمنة بوغاتشار: “بنادم طالع ليه الدم من القنط.. بغا يدير تاريخ ما ديروش شي حد قبلو”

في تصريح قوي لبرنامج “Base Camp” على قناة RMC Sport، حلّل الدرّاج الفرنسي المعتزل، أرنو ديمار، الهيمنة المطلقة ديال تاديي بوغاتشار على عالم الدراجات. ديمار كيشوف بلي السيطرة ديال بوغاتشار وصلات لدرجة خلات هاد البطل يحس بـ “الملل”، الشيء اللي كيدفعو يقلب على تحديات تعجيزية بحال سباق “باريس-روبيكس”، فاش شارك فيه وهو عارف بلي ماشي من الاختصاص ديالو.

ديمار أكد بلي بوغاتشار هو “أفضل درّاج في التاريخ”، وبلي التواجد ديالو في السباقات الكبيرة بحال “تور دو فرانس” كيخلي المنافسين يحسو بالإحباط، حيت كيوليو يتنافسو غير على المرتبة الثانية. ديمار وصف هاد الحالة بالقول: “بنادم كيكون معصر وكيلهت في العقبات، وهو كيكون كيهضر ومرتاح، هادشي كيبين الفرق الشاسع في المستوى”.

وحسب ديمار، بوغاتشار مراضيش بالألقاب العادية، بل باغي يكتب تاريخ جديد مسبق لشي حد دار بحالو. ورغم أن “باريس-روبيكس” كيشكل عائق بدني ليه، إلا أن ديمار مقتنع بلي بوغاتشار غادي يفوز بيه في الآخر، حيت هاد “الأسطورة” معندوش حدود، وطموحو هو يكسر كاع القواعد الكلاسيكية ديال هاد الرياضة.