شعلات العافية من جديد بين تل أبيب وأنقرة، من بعد ما خرج رئيس الوزراء الإسرائيلي بنيامين نتنياهو بانتقادات قاصحة ضد الرئيس التركي رجب طيب أردوغان. هاد التوتر جا بسباب تصريحات أردوغان اللي حذر فيها من “استفزازات” تقدر تفركع اتفاق وقف إطلاق النار اللي تدار مؤخراً بين ميريكان وإيران، ودعا ترامب باش يستغل هاد الهدنة للوصول لسلام دائم.
نتنياهو ما سكتش، وجاوب عبر منصة “إكس” باللي إسرائيل غادية تستمر في الحرب ديالها ضد “النظام الإرهابي الإيراني” وحلفاءُه، واتهم أردوغان بالازدواجية، حيت حسب قول نتنياهو، كايحمي هاد الجماعات وفي نفس الوقت كايقمع الأكراد.
من جيهة أخرى، وزير الدفاع الإسرائيلي، يسرائيل كاتس، دخل حتى هو على الخط ووصف أردوغان بـ”نمر من ورق”، حيت ما كاياخد حتى موقف فاش كايتضربو الأراضي التركية، واتهمو بالتحريض على معادات السامية ومحاولة تنظيم محاكمات صورية ضد قادة إسرائيل. كايظهر أن هاد الملاسنات الدبلوماسية زادت عمقات الفجوة بين الطرفين، في وقت كايعيش فيه الشرق الأوسط مخاض سياسي وعسكري معقد.