كتشير تقارير صحفية دولية، وعلى رأسها شبكة “TalkSPORT”، باللي المستقبل ديال النجم الأرجنتيني إنزو فيرنانديز مع نادي تشيلسي الإنجليزي ولا كيعرف تحول مفصلي. كيبان باللي واللاعب، اللي عندو 25 عام، باغي يخوض تجربة جديدة فـ “الميركاتو” الصيفي الجاي، والوجهة المفضلة ديالو هي ريال مدريد الإسباني، حيت كيعتبر هاد الخطوة حلم مسيرة باش يولي أسطورة فـ “السانتياغو برنابيو”.
الرغبة ديال إنزو فالمغادرة جات بسباب عدم الرضا ديالو على بعض القرارات داخل تشيلسي، خصوصاً من بعد رحيل المدرب إنزو ماريسكا. ورغم الإغراءات المالية الخيالية اللي جاية من دوري روشن السعودي (بين 200 و250 مليون أورو) من أندية بحال النصر والاتحاد، إلا أن اللاعب رافض فكرة الانتقال للخليج فهاد الوقيت.
فالمقابل، باريس سان جيرمان حتى هو مراقب الوضع عن قرب، ولكن إدارة تشيلسي متمسكة باللاعب اللي عقدو كيسالي فـ 2032 وتعتبرو ركيزة أساسية. السؤال اللي كيطرح راسو دابا هو: واش الرغبة ديال إنزو وضغط ريال مدريد غادي يقدروا يقنعوا “البلوز” بالتخلي على النجم ديالهم؟