تخوف الإسبان من المغرب

كشف استطلاع للرأي نشراتُه صحيفة “إل إسبانيول” (El Español) على أن بزاف ديال الإسبان كيشوفو فالمغرب تهديد عسكري جدي، بنسبة وصلت لـ 57.6%. هاد التخوف جاي بالأساس من المطالب المغربية بالسيادة على مدينتي سبتة ومليلية المحتلتين، وهو شعور كيتشاركو فيه أغلبية أنصار الحزب الشعبي وحزب “فوكس” اليميني، وحتى نص ديال المنتمين للحزب الاشتراكي.

النتائج بينات بلي كتر من 60% من المستجوبين كيطالبو الدولة الإسبانية باش تبعد ديبلوماسياً على الجار الجنوبي، وتزيد تقرب من الولايات المتحدة الأمريكية؛ هاد الأخيرة اللي وصل تأييد التحالف معاها لـ 61.7%. فالمقابل، بقات روسيا هي التهديد اللول فعيون الإسبان بنسبة 68% بسبب حرب أوكرانيا، بينما جاو قوى خرين بحال إيران والصين فدرجات قل من ناحية الخطورة العسكرية.

هاد الأرقام كتعكس انقسام كبير فالشارع الإسباني حول سياسة “بيدرو سانشيز” الخارجية، اللي كيحاول يوازن فالعلاقة مع الرباط، فلوقت اللي كيشوف فيه جزء واسع من الشعب الإسباني بلي هاد التقارب ماشي فمصلحة الأمن القومي ديالهم.