استقبل كاتب الدولة الأمريكي فالدفاع، بييت هيغسيث، بوشينطن، الوزير المنتدب المكلف بإدارة الدفاع الوطني، عبد اللطيف لوديي، والجنرال دوكور دارمي المفتش العام للقوات المسلحة الملكية، محمد بريظ، فإطار الاجتماع 14 للجنة الاستشارية المغربية-الأمريكية للدفاع.
هاد المباحثات، اللي حضرها السفراء يوسف العمراني ودوق بوكان، ركزات على تطوير التعاون الاستراتيجي فمجالات الصناعة الدفاعية والأمن السيبراني. الطرفين أشادوا بالعلاقات التاريخية المتينة اللي كتجمع الرباط وواشنطن، تحت قيادة قائدي البلدين.
المناسبة كانت فرصة للجانب المغربي باش يثمن الموقف الأمريكي الداعم لسيادة المملكة الكاملة على صحرائها، مع إبراز دور المغرب كفاعل أساسي فاستقرار المنطقة. وفهاد السياق، تم توقيع “خارطة طريق” جديدة للتعاون العسكري كتمتد لعشر سنوات مقبلة. هاد الاتفاقية كتجسد عمق الشراكة اللي بدات هادي 250 عام، فاش كان المغرب أول دولة كتعترف باستقلال الولايات المتحدة، وكتطمح باش تعزز الجاهزية الدفاعية وتواجه التحديات الأمنية المشتركة فالمستقبل.