المغرب حاضر بقوة فجنيف نهار 13 و14 أبريل، فاجتماع الخبراء التابع لمؤتمر الأمم المتحدة للتجارة والتنمية (CNUCED)، باش يناقش مستقبل النقل البحري العالمي. أمين بنيوسف، مدير إزالة الكربون فمركب “طنجة ميد”، غادي يمتل التجربة المغربية فالانتقال الطاقي وتطوير الموانئ، وسط ظروف دولية صعيبة وموترة كتعيشها التجارة العالمية.
هاد اللقاء كيركز على ضرورة تأقلم الموانئ مع التحولات البيئية وتقليل الانبعاثات الملوثة، خصوصا أن الموانئ ولات نقط حساسة فهاد “الروينة” اللي كيعرفها العالم. بنيوسف غادي يشارك فندوة دولية كتهضر على عصرنة البنيات التحتية باش تواكب التغيرات المناخية.
النهار الثاني من الاجتماع غادي يتخصص لتبسيط المساطر التجارية والرقمنة والأوطوماتيك فديوانة، حيت الخبراء كيعتبروا بلي الأنظمة الرقمية هي اللي كتضمن الشفافية وسلاسة المعاملات. الهدف هو رسم خريطة طريق لنقل بحري مستدام وقوي كياخد بعين الاعتبار خصوصيات الدول اللي غادية فطور النمو.