كشف مكتب للأبحاث بلي الأرباح الإجمالية للشركات المغربية عرفات قفزة نوعية بنسبة 38,2% فـ سنة 2025، وهادشي كيعكس تحسن هيكلي كبير فالاقتصاد الوطني. هاد الانتعاشة كترجع بالأساس لشركة “اتصالات المغرب” اللي حققات أرباح صافية وصلات لـ 7 مليار درهم، بعدما تجاوزات النزاع القضائي مع “وانا” ووقعو اتفاقية استراتيجية لتطوير شبكة الـ 5G والألياف البصرية.
حتى يلا حيدنا اتصالات المغرب، كيبقى الربح طالع بـ 25,7% بفضل قطاع المعادن، خاصة شركة “مناجم” اللي استفدات من غلاء أسعار المعادن فالعالم. القطاع البنكي حتى هو أكد القوة ديالو بأرباح وصلات لـ 21,7 مليار درهم، تصدرها بنك “التجاري وفا بنك” بزيادة 1,1 مليار درهم، متبوع بـ “بنك إفريقيا” و”البنك الشعبي”.
أما قطاع البناء والأشغال العمومية (BTP)، فاستفاد بزاف من مشاريع البنية التحتية وتحضيرات أفق 2030، مع مساهمات قوية من شركات بحال “TGCC” و”لافارج هولسيم”. هاد النتائج الإيجابية جات فـ سياق ماكرو-اقتصادي مزيان، حيت توقعات النمو وصلات لـ 4,7% وتضخم تحت 1%، زيادة على تحسن الظروف المناخية اللي عطات رؤية واضحة للمستثمرين.