عرفات أسواق الطاقة العالمية واحد القفزة صاروخية هاد السيمانة، بحيث طلع ثمن برميل “الويست تيكساس” بـ 6.14% لـ 89 دولار، وبرميل “برنت” لـ 95.49 دولار. هاد الارتفاع جا مور التوتر الحاد بين واشنطن وطهران، خاصة بعد ما سيطرات البحرية الميريكانية على سفينة شحن إيرانية “توسكا” في خليج عُمان، الشيء اللي خلى إيران تهدد برد سريع وقوي.
الأوضاع تعقدات كثر مع إعلان طهران تعليق الحوار مع ميريكان وقرارها باش ترجع تفرض رقابة شديدة على مضيق هرمز، اللي كيدوز منه خمس التجارة العالمية ديال البترول والغاز. هاد التقلبات خلات المستثمرين يتخوفوا من “عدم اليقين”، وخاصة أن استمرار الصراع في الشرق الأوسط كينذر بموجة تضخم دائم، الشيء اللي كيدفع البنوك المركزية تحافظ على أسعار فائدة طالعة.
في المقابل، تراجع الذهب بـ 0.88% لـ 4.788 دولار للأونصة حيت المستثمرين فضلوا الدولار اللي انتعش قدام الين الياباني. أما أسواق الأسهم في آسيا، فبقات صامدة نوعاً ما، حيت المؤشرات في طوكيو وسيول وهونغ كونغ سدات على أرقام خضراء، واخا المخاوف من تذبذب الأسواق باقة قوية بسبب التهديدات الجيوسياسية.