حذّر مجلس المطارات الدولي فـأوروبا من أزمة حادة ووشيكة فـتزويد وقود الطائرات “الكيروسين”، بسباب التوترات اللي عرفها مضيق هرمز. وفـرسالة وجهها للمفوضية الأوروبية، أكد المجلس بلي استمرار توقف الملاحة فهاد الممر الاستراتيجي لأكثر من تلاتة دالسيمانات، غادي يتسبب فنقص شامل فهاد المادة الحيوية على الصعيد القاري.
المجلس، اللي كيمثل كتر من 600 مطار، طالب بروكسل بضرورة مراقبة “مستعجلة ودقيقة” للمخزونات والأسعار اللي طارت بسباب الحصار الإيراني للمضيق، حيت كيدوز من تم تقريبًا 20% من الإنتاج العالمي دالبترول والغاز.
وخا كاين وقف مؤقت لإطلاق النار، إلا أن الطيران العالمي كيعيش ضغط كبير؛ بزاف دالشركات اضطرات تلغي رحلاتها أولا تزيد فأتمنة التذاكر باش تواكب الغلاء الصاروخي دالكيروسين، اللي فات فسرعتو الارتفاع ديال البترول الخام. هاد الوضع كيهدد قطاع الملاحة الجوية بالشلل إلا ما رجعاتش الأمور لطبيعتها فمضيق هرمز فوقت قياسي.