بصم الدولي الإيطالي ساندرو تونالي، نجم نيوكاسل يونايتد، على عودة قوية للميادين خلاتو يولي محط أنظار كبار الدوري الإنجليزي. فحسب تقارير الصحفي “أكرم كونور”، نادي أرسنال دخل بقوة فسباق التعاقد مع “الميلانيستا” السابق (25 عام)، حيت كيشوف فيه ميكيل أرتيتا القطعة الناقصة باش يعطي توازن وإبداع أكتر لوسط ميدان “الغانرز” الموسم الجاي.
ولكن، هاد الصفقة ماشي ساهلة؛ نيوكاسل ما مستعدش يتخلى على الركيزة ديالو بأي تمن، وحدد مبلغ خيالي كيوصل لـ 115 مليون يورو لتسريح اللاعب اللي كيرتبط بعقد حتى لـ 2028. تونالي اللي سجل هاد الموسم 3 دالأهداف وصنع 7، كيتواجد كذلك فالرادار ديال مانشستر سيتي ومانشستر يونايتد، الشي اللي غادي يخلي الصيف الجاي ساخن بخصوص مستقبلو. كيبقى دابا السؤال واش أرسنال مستعد يحط هاد “الشيك” الضخم باش يحسم الصفقة لصالحه ويخطف النجم الإيطالي من يد المنافسين.